Kvifor er det til dømes slik at Pluto og Bolivar (som begge er hundar) er underordna Mikke Mus og Donald Duck? Kvifor er ikkje Langbein og Pluto likestilte? Kva har skjedd der? Og dette er langt ifrå det einaste dømet. Bestemor Duck sin bondegård er jo eit kapittel for seg sjølv…! På bondegården har Bestemor Duck høner. Er det berre eg som syns at det er veldig, veldig unaturlig?Ein annan ting som irriterer meg, er at Mikke og Donald er like store. Eg har framleis til gode å sjå ei mus som er så stor som ei and. Og det blir ekstra dumt når dette berre gjelder for nokre utvalte dyr. Ta Snipp og Snapp til dømes: Skulle ikkje dei då i teorien ha vore like store som Mikke Mus (om ikkje større!)?
Og så var det dette med matvanane, då… Når det er høsttakkefest eller andre høgtider, gaflar Donald og gjengen i seg kalkun. Det er nesten så eg grøssar litt på ryggen over biletet der Donald har festa den nysteikte kalkunen fast i skrustikka og er klar for å gå laus på den med øks (…). Ein skulle heller ikkje tru at det var heilt ”stuereint” å ete egg og bacon til frukost når ordføraren av denne sinnsyke byen er ein gris.Og berre så eg har nemnt klisjéen også: Kvifor har Donald ein handduk strategisk plassert rundt livet når han kjem ut av dusjen, dersom han ikkje treng bukser vanlegvis? Eg berre spør.
